काठमाडौँ । काठमाडौँमा पछिल्लो समय साइबर अपराध र अनलाइन ठगीका घटना मुख्य सुरक्षा चुनौतीका रूपमा उब्जिएका छन् । जिल्ला प्रहरी परिसर काठमाडौँका अनुसार चैत महिनामा मात्रै साइबर अपराध र ठगीसँग सम्बन्धित २६१ ओटा उजुरी दर्ता भएका छन् । जसमध्ये अनलाइन शपिङका नाममा हुने ठगीको हिस्सा सबैभन्दा ठुलो छ ।
प्राप्त निवेदनहरूमध्ये १०० ओटा उजुरी अनलाइन शपिङसँग सम्बन्धित रहेका छन् भने ओटीपी फ्रड र अकाउन्ट ह्याकिङका ४०, पार्सल गिफ्टको प्रलोभनका ३० र वैदेशिक रोजगारीका नाममा १५ ओटा उजुरी परेका छन् ।
यो पनि पढ्नुहोस्
यसका साथै टेलिग्राम टास्किङ, अनलाइन जब र रूम फाइन्डर फ्रडजस्ता नयाँ शैलीका ठगीहरूले पनि सर्वसाधारणलाई सास्ती दिइरहेको प्रहरीको तथ्याङ्कले देखाएको छ ।
यस्ता अपराध न्यूनीकरण र जनचेतना फैलाउने उद्देश्यले प्रहरीले चैत महिनामा समुदाय र विद्यालय केन्द्रित कार्यक्रमहरू सञ्चालन गरेको छ । ‘समुदाय-प्रहरी साझेदारी’ कार्यक्रम अन्तर्गत कुल २६९ वटा विभिन्न सचेतनामूलक कार्यक्रमहरू सञ्चालन गरिएकोमा त्यसबाट १३ हजार १२५ जना नागरिक प्रत्यक्ष रूपमा लाभान्वित भएको प्रहरीले जनाएको छ ।
प्रहरीले लैङ्गिक हिंसा, साइबर सुरक्षा, लागूऔषध विरुद्धको सचेतना र चोरी नियन्त्रणका विषयमा २३७ वटा समुदाय केन्द्रित कार्यक्रमहरू सम्पन्न गरेको छ । त्यसैगरी, काठमाडौँका विभिन्न विद्यालयहरूमा लागूऔषध, साइबर सुरक्षा र ट्राफिक सचेतनासम्बन्धी १७ वटा विशेष प्रशिक्षण कार्यक्रममार्फत १ हजार ४४३ जना विद्यार्थीहरूलाई कानुनी र सुरक्षात्मक विषयमा सचेत गराइएको परिसरले जनाएको छ ।
प्रतिक्रिया दिनुहोस्