काठमाडौं । ओपनर आशिफ शेख र दीपक बोहराको अविजित शतकीय पारीमा एपिएफले पिएम कपमा कर्णाली प्रदेशलाई १० विकेटको लज्जास्पद नतिजामा हराएको छ।
यो जितमा कमल ऐरी र अभिषेक गौतमको प्रदर्शन पनि अब्बल रह्यो। एपिएफको यो दोस्रो जित हो।
यो पनि पढ्नुहोस्
जितको लागि १ सय ८ रनको अत्यन्त सहज विजय लक्ष्य एपिएफले मात्र १२ ओभरमा बिना विकेटको नोक्सानीमा पूरा गर्यो। ओपनर आशिफ र दीपकले अविजित १ सय ८ रनको साझेदारी गरे।
यो क्रममा आशिफले ३२ बलमा नै अर्धशतक बनाए। उनले उत्कृष्ट ब्याटिङ गर्ने क्रममा ३८ बल खेल्दै १२ चौका र १ छक्कासहित अविजित ६५ रन बनाए।
दीपकले ३४ बलको सामना गर्दै ६ चौका र २ छक्का सहित अविजित ४२ रनको पारी खेले। कर्णालीका कुनैपनि बलरको विकेट लिन सकेनन्।
त्यसअघि जनकपुरको रामजानकी मल्टीपर्पोज स्टेडियममा टस जितेर पहिले ब्याटिङ गरेको कर्णाली प्रदेश ३६ ओभरमा अल आउट हुदै मात्र १ सय ७ रनमा समेटियो।
कर्णालीका खेलाडीहरूले ब्याटिङमा निराशाजनक प्रदर्शन गरे। ३८ रन जोड्दा ४ विकेट गुमाउँदा कमजोर सुरूवात गरेको कर्णाली कुनै पनि समय सम्हालिन सकेन।
छैटौं क्रमका अर्जुन घर्तीले सर्वाधिक अविजित ३८ रन बनाए। यस्तै दिपेन्द्र रावतले २५ रन तथा दुई ओपनर रविन्द्र शाहीले १८ रन र सुनिल धमलाले १७ रन बनाए। यी चार बाहेक अन्यले दोहोरो अंकमा रन छुन समेत सकेनन्।
ब्याटिङमा कर्णालीलाई निरिह बनाउन कमल ऐरी र अभिषेक गौतमको प्रदर्शन अब्बल रहयो। कमलले ९ ओभरमा ४ मेडन सहित मात्र २५ रन दिएर ४ विकेट लिए। अभिषेकले १० ओभरमा २ मेडन सहित ४ विकट नै झारे।
छैटौं खेलमा एपिएफो यो दोस्रो जित हो। पहिलो खेल जितेको एपिएफ त्यसपछि ४ खेलमा पराजित भएको थियो। एपिएफले ६ खेलबाट ५ अंक बनाएको छ।
कर्णालीको भने यो चौथो हार हो। ६ खेलबाट टोलीको ३ अंक छ।
प्रतिक्रिया दिनुहोस्