लम्कीचुहा प्रादेशिक अस्पताल सञ्चालनको माग गर्दै आन्दोलनरत स्थानीयले बुधबार लम्कीचुहा नगरपालिकामा तालाबन्दी गरेका छन् ।
लम्कीचुहाकी नगरप्रमुख सुशीला शाही र सुदूरपश्चिम प्रदेशका मुख्यमन्त्री कमलबहादुर शाहबीचको विवादका कारण अस्पताल स्तरोन्नति प्रक्रिया प्रभावित भएको भन्दै स्थानीय आन्दोलित बनेका हुन् । नगरप्रमुख शाहीले अस्पताल स्तरोन्नतिमा अवरोध गरेको आरोप स्थानीयको छ ।
यो पनि पढ्नुहोस्
नगरपालिका कै आग्रहमा प्रदेश सरकारले संघीय सरकारको स्वीकृति लिएर १५ शैयाको अस्पताललाई ५० शैयामा स्तरोन्नति गरी प्रादेशिक अस्पतालका रूपमा सञ्चालन गर्ने योजना बनाएको थियो । सोही योजना अनुसार प्रदेशको सामाजिक विकास मन्त्रालयले सम्झौताको लागि पटक–पटक पत्राचार गरे पनि नगरपालिकाले बेवास्ता गर्दै आएको छ ।
पछि प्रदेश सरकारले चैत १ गते प्रादेशिक अस्पताल व्यवस्थापन समिति गठन गर्दै तीन जना कर्मचारी खटाएको थियो । तर, बैशाख २८ गते अस्पतालमा हाजिर हुन पुगेका प्रदेश सरकारबाट खटिएका कर्मचारीलाई नगरप्रमुख शाहीले नगर प्रहरी परिचालन गरी अवरोध गरेको बताइएको छ ।
प्रदेश सरकारले अस्पताल स्तरोन्नतिका लागि चार करोड रुपैयाँ विनियोजन गरेको भए पनि विवादका कारण योजना अलपत्र पर्ने र बजेट फ्रिज हुने अवस्था आएको भन्दै स्थानीयहरू प्रादेशिक अस्पताल सञ्चालनको माग गर्दै आन्दोलनमा उत्रिएका हुन् ।
१५ शैयाको उक्त अस्पतालको व्यवस्थापन समितिको अध्यक्ष नगर प्रमुख शाही नै हुन् । प्रदेश सरकारका अधिकारीका अनुसार शाहीले प्रादेशिक अस्पताल बनेपछि पनि आफू नै अध्यक्ष रहन चाहेको बताइएको छ ।
तालाबन्दीका क्रममा आन्दोलनकारी र सुरक्षाकर्मीबीच केही समय तनावको अवस्था सिर्जना भएको थियो । प्रहरीले थप सुरक्षा बलसमेत माग गरेको जनाएको छ । आन्दोलनका कारण लम्कीचुहामा दिनभर तनावपूर्ण अवस्था रहेको थियो ।
स्थानीयले लम्कीचुहा नगरपालिका ४ नं. वडा कार्यालयमा समेत तालाबन्दी गरेका छन् । आन्दोलनरत पक्षका पारश देवकोटाले प्रादेशिक अस्पताल सञ्चालनका लागि आएका डाक्टर तथा कर्मचारीलाई नगरप्रमुखले अवरोध गरेको विरोधमा तालाबन्दी गरिएको बताए । उनले अस्पताल यथाशीघ्र सञ्चालन गर्न दिनु पर्ने बताए ।
मन्त्रालयले अस्पताल सञ्चालनका लागि डाक्टर कमलेशप्रसाद यादवलाई मेडिकल सुपरिटेन्डेन्टका रूपमा खटाएको थियो । साथै एक जना लेखा अधिकृत र एक जना चिकित्सक कर्मचारी पनि पठाइएको थियो । अस्पताल स्तरोन्नतिको विषयमा लामो समयदेखि चलिरहेको विवाद कर्मचारीलाई हाजिर हुन नदिएपछि थप चर्किएको बताइएको छ ।
प्रतिक्रिया दिनुहोस्