धनगढी । सुदूरपश्चिम प्रदेशका मुख्यमन्त्री कमल बहादुर शाहले नेकपा (एमाले) का अध्यक्ष तथा पूर्वप्रधानमन्त्री केपी शर्मा ओलीलाई पहिले भेटी त्यसपछि आफ्नो पार्टी नेपाली कांग्रेसका सभापति गगन कुमार थापासँग भेट गरेको विषयलाई लिएर विभिन्न सञ्चार माध्यममा आएका समाचारप्रति मुख्यमन्त्रीको सचिवालयले प्रष्टीकरण दिएको छ ।
मुख्यमन्त्री शाहको सचिवालय प्रमुख प्रयागराज खनालद्धारा सामाजिक सञ्जालमार्फत जारी विज्ञप्तिमा वैशाख ३१ गते मुख्यमन्त्री शाह शहीद दशरथ चन्द स्वास्थ्य विज्ञान विश्वविद्यालयको सिनेट बैठकमा सहभागी हुन काठमाडौं गएको उल्लेख गरिएको छ ।
यो पनि पढ्नुहोस्
सचिवालयका अनुसार उक्त बैठक सम्पन्न भएपछि नेपाली कांग्रेसका सभापति गगन कुमार थापा पोखरामा रहेकाले तत्काल भेटघाट सम्भव नभएको र त्यसपछि नेकपा (एमाले) अध्यक्ष केपी शर्मा ओलीसँग भेटवार्ता गरिएको हो ।
त्यस पश्चात् शुक्रबार मात्र पार्टी सभापति गगन कुमार थापा पोखराबाट काठमाडौं फर्किएपछि नेपाली कांग्रेसको केन्द्रीय कार्यालय सानेपामा बिहान ११ बजे मुख्यमन्त्री शाहले सभापति थापासँग भेटघाट गरेका जनाइएको छ ।
सचिवालयले उक्त भेटघाटका क्रममा सुदूरपश्चिम प्रदेशको स्थायी राजधानी व्यवस्थापन, आगामी आर्थिक वर्षको बजेट निर्माण तथा प्रदेशसभामा दर्ता भएका विभिन्न विधेयकका विषयमा छलफल भएको जानकारी दिएको छ ।
मुख्यमन्त्रीको सचिवालयले विभिन्न सञ्चार माध्यममा प्रकाशित समाचारप्रति ध्यानाकर्षण भएको जनाउँदै भेटघाटलाई अन्यथा ढंगले व्याख्या नगर्न आग्रह समेत गरेको छ ।
प्रतिक्रिया दिनुहोस्